Gur duilich leam mar tha mi
's mo chridhe 'n sàs aig bròn
bhon an uair a dh'fhàg mi
beanntan àrd a'cheò,
gleanntannan a'mhànrain
nan loch, nam bàgh, 's nan stròm
's an eala bhàn 'tha tamh ann
gach là air 'm bheil mi'n tòir.
A Mhagaidh na bi tùrsach
a rùin, ged gheibhinn bàs.
Cò am fear am measg an t-sluaigh
a mhaireas buan gu bràth?
Chan eil sinn uileadh ach air chuairt
mar dhìthein buaile fàs
bheir siantannan na bhliadhna sìos
's nach tog a'ghrian an àird.
Tha 'n talamh leir mun cuairt dhiom
'N mheallan suas 's na neoil
Aig na 'shells' a'bualadh
Cha leir dhomh bhuam le ceo
Gun chlaisneachd aig mo chluasan
Le fuaim a'ghunna mhoir
Ach ged tha 'n uair seo cruaidh orm
Tha mo smuaintean air NicLeoid
Mas e 's gu bheil e 'n dàn dhomh
o'n bhlàr gu'n till mi beò,
is gu'm faic mi'n t-àite
's an deachaidh m'àrach òg,
bidh sinne 's crathadh làmh againn
is bilean blàth toirt phòg,
's mo ghealltanas bidh pàighte dhut
le fàinne chur mu d'mheòir.
Oidhche mhath leat fhéin, a rùin,
nad leabaidh chùbhraidh bhlàth,
cadal sàmhach air a chùl
do dhùsgadh sunndach slàn.
Tha mise 'seo 'san truinnsidh fhuair
nam chluaisean fuaim a bhàis,
gun dùil ri faighinn às le buaidh
tha'n cuan cho buan ri shnàmh.
