ЦIар берцинав ХIабиб гIемер рехсезе
РачIа, бусурбаби, бисмиллагь лъезин,
Баркат-рахIматалъул аслолъун вугев
Гьесде салат битIун сухIбат гьабизин
Салат битIарасе шафагIат щолев
ШафигI гьев вугелъул, тIалаб гьабизин,
ТIолго гIаламалъул амингилъидал,
Аманилан ахIун, хIелун гьаризин!
Гьарун вачIарасе комек гьарзаяв
Расуласда кверал цере ккун чIезин,
Цере ккурал койрал нахъе чIваларев
Нелъерго ТIагьалгун хурхен гьабизин!
Гьесул нуранияб заталда цере
ХIузуралдаги чIун, файиз босизин!
ХIалкIвараб куцалда магIият гьабун
МагIнавияб сухIбат камил гьабизин!
Камалатал тIокIав Гьадил умами
Мажлис берцинлъизе аскIов ахIизин,
Аллагьас халкъалъе рахIматлъун кьурав
Мукъиму суннати далиллъун ккойзин!
Далиллъун жив ккурал мекъса кколарев
СахIибу василат цеве тIамизин,
Цеве жив тIамурал пашманлъуларев
ШафигIгун рукIине жигар бахъизин!
