A matina nun c’è suli ca mi sconza stu duluri
E la sira nun c’è friscu ca m’astuta stu disiu
La notti nun e’ iornu ma lu stissu m’arrusbigghiu
La fami scumpariu e la siti si ni iu
Quannu viru a tia strinci u pettu ca quarìa
Quannu viru a tia sautu ‘u passu ‘nta la via
Quannu viru a tia scordu tutt’avimmaria
Quannu viru a tia mi si sbota a fantasia
Nun quagghia la ricotta, cchiu’ nun fazzu li viscotta
Non sfornu pani bonu, nun ti cantu e nun ti sonu
Nun cogghiu cchiu’ lu meli, nun serbi pi stu mali
A gramigna ‘nda la vigna la racina mi cummogghia
Cu la grazia da to uci d’intra i tia mi cunnuci
Pi la danza du to passu iu’ stu ballu ti lu lassu
Nun sentu mancu friddu, d’amuri mi cummogghiu
Putenti comu bracia, si lu suli ca m’abbrucia
‘nda sti iorna disgraziati, nun mi carmunu i pruriti
‘nda sti iorna biniditti, ma ‘mbriacu senza vutti
Senza vutti e senza vinu persi a testa allu matinu
Persi anche la ragiuni e ti vidu a tutti ‘ignudi
Mi vinnu stu pitittu di vasariti lu pettu
Mi vinni stu pitittu di cunzariti lu lettu
Addivintai vastasu ‘nda lu sonnu iu’ti vasu
Cu la ucca e cu li manu ti sunassi u marranzanu
