Breu vers per tal que meins i poing
Fatz e que sia ben apres,
Q'ieu sui trobaire, mas non ges
De celz rics qe·is fant auzir loing,
E s'anava mos chans tro lai
Don la razons ven a mi sai,
Ja non volria plus anes.
De trop ric amor non ai soing,
Sol de mon paratge n'agues,
Qe·l poders ni·l semblans non es
En mi ni fui faitz de tal coing
D'enquerre ric joi ni s'eschai
Ni devenir, que ben o sai
No·m poiria qan be·i poignes.
Mais dei doncs amar e mon poing
Un bel auzellet q'ieu tengues
C'al cel doas gruas o tres,
Per q'ieu non prec ni non somoing
D'amar dompna s'a far non fai;
Jal fol cabrier non semblerai
Qu'enquis qe·il reina l'ames.
Las ricas c'una non caloing
Lais als rics donadors cortes,
C'una basseta m'a conques
Tal que de Paris tro al Groing
Genseer non es ni meills noill vai
A nuilla de fin pretz verai
Ab lo poder qu·ill ten en pes.
Ad aquesta soplei e joing
Mas mans per referre merces,
Que la benananssa on m'a mes
Mi val mais e ges no·m vergoing
Si trop rica dompna non ai,
Que·l sens e la beutatz l'estai
Tan aut que paucas li son pres.
E
De ma ricor, ni meins ni mai,
Am e conosc que mieills m'estai
Que si trop autamen ames.
